當年今日
關於我們

【網上論壇】點解被捕時我笑笑口? (壁屋手足 白卡龍)

蘋果日報 2020/03/18 18:21


親愛的HKers︰
距離上次寫公開信已經差唔多一個月,收到議辦回信之後,家好努力咁回覆緊。其中有封問起我個名…Er…我只能夠答「我冇白卡」,可能係落場踢波會踢得癲啲咁啫。成日都同對面隊有碰撞,俾人黃牌過一次都冇停,家俾人紅牌出場冇得踢,就嚟悶L死,好想快啲復出呀!
收信得知「寒冷並不可怕,人心冷卻才更可怕,#請保持心的熱度」呢件事。喺監獄入面更加能夠體會到呢句嘢,自上年尾入到壁屋度過多個寒夜,但係「咁係唔會令到我驚㗎」,反而有時見少咗手足嘅消息會更加驚,希望「武肺」快啲過去,手足們重拾鬥心。原諒我文筆唔太好,唔識講啲咩鼓勵說話,可能講單有趣嘢(至少我覺得係)畀大家聽,放鬆下心情。
之前有個朋友問我點解被捕嗰陣張相笑笑口,雖然我未有機會睇到,但可以講九成係笑緊啲欠缺智商嘅「忠誠勇毅」,皆因我被帶到狗屋嘅時候,佢數我隨身嗰二千幾蚊(得幾張紙幣同一個硬幣)數咗分幾兩分鐘都數錯,最尾忍唔住提佢先數啱,唔怪之得遊行人數成日都數L錯,靠「3萬」個咁嘅「忠誠勇毅」,香港真係玩L完。「唔係歧視牠們,不過牠們真係好低能。」
睇新聞同報紙見太子站半周年,有好多手足上街,仲有落單狗狗,可惜拉咗百幾人。真係好想出返嚟加入手足,可惜入咗壁屋,無緣與手足並肩作戰。對於「忠誠勇毅」玩槍落荒而逃單嘢,我只係諗起一句「你他媽不是軍人」(殘體字普通話),其後牠們報復性咁將記者、普通市民包圍射TG,更加反映牠們嘅IQ同EQ都係低處未算低。
希望復活節前可以「復活」到啦,等埋我呀手足!鐵籠可以限制我身體嘅自由,但限制唔到我自由嘅思想。希望手足都保持自由思想。
壁屋手足 白卡龍
2020年3月3日
(編按:此為工黨立法會議員張超雄收到被還柙手足的公開信,由張超雄代為投稿。如有意回信,請寄到「中區立法會道一號立法會綜合大樓1017室張超雄立法會議員辦事處」,註明回覆給哪位手足,以及留低電話號碼或其他聯絡方法,方便議辦跟進。)
【蘋果論壇: https://hk.appledaily.com/column/onlineforum ,投稿網上論壇可電郵到[email protected]