港股噚日表現同天氣認真應景,都係矇查查。美股止跌回穩,但港股依然腳軟軟,好友連萬一關都棄守,究竟係無心戀戰定誘敵深入?暫時好難估。原本形勢對淡友有利,但大批備兌證蓄勢待發,港股隨時大轉勢。趙飛雲繼續扮「忍者」,唔敢亂出手。
二線石油化工股突然飆升,上海石化(338)升近10%,所羅門調高上海石化評級至買入,話8毫子水平可吸納。睇盤路確係基金買貨嘅格局,短炒要執幾格應該唔難。噚日張圖就造得幾靚,守住50日線收市,短炒可以0.75元作止蝕位。
滙證睇好Sunday
滙證噚日推介Sunday(866),話佢業務前景轉佳,2003年可以有錢賺,目標價定為0.46元。唔知係咪因為呢個緣故,隻股噚日亦升10%,收0.32元。平心而論,Sunday現價確係殘啲,加上市場始終憧憬中小型電訊公司會出現合併潮,會周不時借呢個消息炒番轉。
趙飛雲留意緊隻深圳國際(152),隻股近期跌近30仙支持都幾強,噚日逆市升1仙,收31.5仙,可惜成交唔多配合。跌近30仙都可以買番啲,短炒28仙止蝕。