韓國「國民MC」劉在錫出道初時曾經歷過艱辛嘅低潮期，而節目《SectionTV演藝通信》噚日就公開劉在錫於無名時期喺廁所自拍嘅影片。

該影片係劉在錫於出道9年時拍攝嘅，當時佢為咗向觀眾展示自己嘅日常生活，不惜半裸上身喺廁所自拍，並表示：「好多人成名後都會有所改變，以後如果我成名，我會為咗唔令自己被改變而努力。」據知劉在錫成名後非常照顧新人，即使自己已經完成拍攝，都會等埋後輩先一齊收工。