11次大滿貫得主拿度，自從喺7月溫網次圈被淘汰之後，就一直養傷，到家都未有確實復出日期。呢位西班牙網球手日前就抱怨話，今時今日網球壇硬地賽事實在太多，對球員膝頭做成好大負擔；復出之後，會減少參加硬地賽咁話。網球賽事分為草地、泥地同埋硬地賽，拿度喺日前接受訪問嗰陣話：「我都係焗住要參加硬地賽，因為家每年4次大滿貫，佔一半都係硬地賽，但我認為咁對網球運動發展係錯嘅。今時今日你唔會見到足球或者籃球運動員喺呢種硬地上面比賽。事實上，網球運動需要球員快速移動，硬地對我哋嘅身體十分不利。無可否認網球已經係高度商業化嘅運動，而起硬地場係遠比泥地或者草地容易。」

集中火力打泥地

拿度亦暗示，應該唔會喺今年年終賽或者台維斯盃復出，兼且透露自已喺2013年嘅大計。年終賽同台維斯盃決賽同樣喺11月上演，但拿度認為要及時復出都係早咗少少：「我估我將會比以往出戰更多紅土場賽事，雖然已經冇太多選擇。而我預計球迷會喺澳洲（明年初澳網）度見到我，目前對我嚟講最重要嘅，係要完全康復，希望係以100%健康嘅狀態回歸，而唔係日日喺度質疑自己個膝頭仲可唔可以撐落去。」咁矛盾？無非都係硬地嘅澳網獎金、排名分數都多啦。