但係,華華打死都唔信彭定中為咗退休而辭職,如果真係咁簡單,機管局中人使乜如臨大敵,冇人夠膽講呢單嘢。一定有內情。華華早前同官府中人食飯,佢哋都露咗多少口風,話有啲人人工好高。唉,錢又唔係自己嘅,做乜咁緊張呢?不過一朝天子一朝臣,特首曾蔭權舊年中頂咗董建華個位後,都好多位執過啦,港交所、證監會,旅發局以至大學等等最近都換緊阿頭。彭定中係老董01年搵入去嘅,就算交足功課都冇計。佢一早聞到自己冇得留低,自然識做啦。
最明顯係,雖然機管局舊年賺成14億,但彭定中嘅bonus反而減咗40萬,即係成份薪酬減少4.2%喎,話冇嘢至奇啦。
機場係香港經濟重要嘅一環,政府舊年中已經換咗民建聯前主席兼行政會議成員曾鈺成,同資深大律師兼行政會議成員廖長城等人入機管局董事會。出年選特首,又係分餅仔時間,彭定中冇得留低,咁又多個位啦。
李華華