前「新聞王子」李潤庭去年12月被爆出軌，被影到背住空姐老婆Crystal，與人妻小三Tiffany喺赤柱摸pat濕吻，跟住仲帶埋返屋企，形象盡毀，即被冠上「賤男」封號。

李潤庭被勒令停工，兼開記者會道歉。(相關新聞﹕ http://bit.ly/2hajPT4 )
但話晒有貴人余詠珊做最強後盾，今年4月開始復工做《東張西望》外勤記者，上周五更可以重返《東張》主播台。但大部份網民似乎唔多buy，洗版鬧爆﹕「無記冇晒人」、「唔想睇佢」、「趕客」等負評。

其實李潤庭過去半年已經好努力建立正面形象，不時喺instagram放片貼相，做運動、練字、睇書等。不過，《蘋果》記者噚日喺上環東華醫院附近見到李潤庭，大約下午兩點幾，佢同幾個男人食完飯後，行去對面馬路準備上車，估計係啱啱拍完外景，之後要轉地方。

李潤庭把握上車前分幾鐘時間，喺路邊食咗支煙，可能擔心車上嘅人等太耐，李潤庭深吸咗4、5啖唔食，由於附近冇垃圾桶，佢隨手就將煙頭掉去一個暗角位，可能擔心俾人發現，李庭潤都有周圍望下，見經過嘅途人唔為意，又將抹完嘴嘅紙巾掉埋落地，唉，真係有欠公德！