【新增動新聞】

小村莊獲萬人迷光臨，村民點會唔興奮！碧咸近日乘搭私人直升機，突然降落威爾斯乙組聯賽球隊Llanrhaeadr FC嘅球場，令到球場位於嘅波伊斯區一小鎮嘅居民，爭相嚟到搵呢位前曼聯球星影相。

Llanrhaeadr FC仲識幽默咁喺官方Twitter話，已經同咸爺傾掂數簽埋約，只要搞掂埋轉國籍等手續，對方就會加盟；及後又轉載村莊一對母女，同咸爺合影嘅相，話佢架直升機降落時，整到球場穿咗個大窿。至於好多同村嘅居民，都話估唔到可以親眼見到萬人迷。

至於咸爺點解到埗，就唔係好多人，一般估計都係為拍廣告或幫其他商業贊助搞活動，先至大駕光臨。