曼城主帥哥迪奧拿曾經揶揄熱刺係「哈利卡尼隊」，而今場聯賽亦都證明佢所言甚是，有卡尼在陣嘅熱刺的確唔擔心冇波入。佢今場繼續發揮超高效率連續兩場聯賽大三元，連埋呢兩球佢今年已經喺各項賽事射入56球，超越美斯嘅54球同埋C朗嘅53球，證明英格蘭人唔係垃圾!

另一方面，計計埋埋卡尼成個2017年已經攞到38個入球，超越名宿舒利亞喺1995年射入36球嘅紀錄，成為英超史上一年之內入波最多嘅球員，認真威水!睇返熱刺嘅表現，上半場佢哋佔盡優勢一共有11個射門，卡尼嘅所有射門全部中龍，基本上上半場已經做咗MVP。可能講得誇啲，熱刺冇咗卡尼真係唔掂，因為洛蘭迪唔識入波，孫興民又較適合做輔鋒，所以話賣邊個都可以，但最緊要唔好賣佢。

唔講卡尼，睇返熱刺後防，普捷天奴好鍾意喺大戰起用右捷比亞，之前對阿仙奴、曼城呢啲聯賽都會出佢。可能係資質嘅問題，呢位英格蘭右閘畀唔到人一種穩健嘅感覺，佢嘅經常性失位不時搞到熱刺失波。而今場普帥終於起用高價買入嘅奧里亞，佢今場表現雖然唔太起眼，但上半場6分鐘已差啲入波。呢位右閘位置感唔錯又有身體質素，希望普帥可以出多啲佢。

雖然全場佔盡優勢，但熱刺都要解決防守唔集中嘅問題。可能係上半場早早領先兩粒，熱刺下半場出嚟個陣有啲輕敵，差啲畀沙恩朗同勒美拿破門，如果要對住曼城、利物浦呢啲把握力高嘅球隊，可能比數已經追到去2:2。下半場尾段修咸頓仲同熱刺鬥攻入番兩粒，所以話熱刺要攞前四，後防就要再集中啲，如果唔係卡尼入多多都唔夠失!

文:聰鳴

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM