因狼英「黑金飯局」而聲名大噪的流浮山小桃園海鮮酒家，噚晚又有局，一眾鄉紳為警隊明日之星「元朗一哥」鄧炳強搞farewell party，飯腳鐵膽包括錦田鄉事委員會主席鄧賀年、元朗區議會主席梁志祥等，屏山鄉鄉委會主席曾樹和亦曾露面，但最後過門不入。

上月警隊高層大執位，元朗區指揮官鄧炳強獲欽點保送高層搖籃英國皇家國防學院進修，兩星期後起行，噚晚元朗一眾區議員、鄉紳歡送佢，7點幾鐘眾人陸續到場，直入小桃園包房，八方見裏面筵開五席，場面熱鬧。主家席除咗有鄧炳強外，旁邊係天水圍區議員李月民同梁志祥，席間二人更送上銀碟賀鄧炳強步步高升。

曾樹和過門不入

鄧賀年則與元朗區議員沈豪傑坐埋一枱，民建聯郭強、元朗區議員王威信、八鄉北鄧貴有同八鄉南黎偉雄都畀面捧場，「黑金飯局」出盡風頭嘅尖啤唔見人，放大假嘅狼英都冇份。八方仲喺門外遇上「黑金飯局」座上客曾樹和，以為佢歡送鄧Sir，點知佢煞有介事話約咗朋友晚飯，然後走到隔籬新桃園，冇耐喺後門離開。
喺小桃園搞歡送會認真搞鬼，鄧炳強話由大會安排，即係元朗區議會、撲滅罪行委員會和少年警訊會長會負責，客隨主便，AA制每人夾500蚊，有鮑魚、石斑，每枱有支300蚊紅酒，每席大約5,000蚊。
48歲嘅鄧Sir去英國進修策略同國際關係，八個月前升任元朗警區指揮官，近日因破獲天恒邨斬人案同天水圍氣槍獲好評。

mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange