長毛日前成功入境澳門示威反23條，唔少人都跌眼鏡，連長毛嘅澳門朋友都唔例外。長毛噚日同八方傾番呢單嘢，話佢啲澳門朋友對於佢成功入到澳門示威，都寫個服字，仲特登喺示威之後，請佢食BBQ慶祝，但就食得唔係幾安樂，因為燒緊雞翼腸仔之際，兩名便衣人員就喺正佢哋後面開多個爐一齊燒順便昅實佢哋，長毛自己就冇有怕，但就驚連累啲朋友。

澳門人讚佢好嘢

長毛聲稱，一早已經同啲朋友講，話自己一定入到境，但其實自己心諗都係五五波。佢認為，今次能夠成行，可能因為早前「九哥」蔡耀昌被拒入境，加埋公民黨湯家驊入境時被扣留十分鐘，經傳媒廣泛報道，搞到中央都有啲壓力，下令澳門政府畀佢入境。八方問長毛去到澳門，有冇畀澳門人鬧佢搞事？長毛就話唔多覺，反而遇到唔少人讚佢好嘢，因為覺得佢幫咗啲對23條都好迷茫嘅澳門人，講出心聲。
長毛話，香港同澳門唇亡齒寒，佢希望泛民全部23位議員，都能夠喺澳門諮詢期完結前，一齊過澳門聲援當地民主派，相信效果一定勁過淨係佢自己過大海。