咩叫殺得性起，睇羅理雅就知，第二場幫賀賢贏完「寶成福星」，第三場一班1400米，佢幫另一位鄉里大摩爆冷贏「風花雪月」，一手包辦第二口孖寶，個人連續第二戰起孖，應屆悉尼冠軍騎師露出真功夫。
今場出馬八匹，單係大摩一人已經佔三隻，結果佢又試玩「摩」法幻影，麾下新勝馬「共創美夢」由韋達換咗梁家俊，依然畀落飛黨重插至3.7倍啡燈win開閘，跑落卻無影無蹤，反為摩廐三駒中最冷之「風花雪月」卻由頭放到尾，拉士即使力弱搖頭擺尾，不過都頂得住大熱門高廐「誰可拼」，全場第二冷22倍贏馬，亦幫埋馬主包大偉打破今季齋缽，至於「誰可拼」雖連捷失敗，但投高廐後依然全上名，五戰一勝四位，表現忠心準繩。今場跑第三係另一匹摩廐馬「貳寶」，殿軍「勁勢」，而「共創美夢」居然尾二過終點，曳到你唔信，馬少場合又試爆冷收場，玩死馬迷！
「風花雪月」馬主包大偉早前曾去緬甸仰光靜修，回港後即有頭馬見面，他說：「『風花雪月』在普通一班賽事列陣，實力佔優，賽前我已對該駒有一定信心。」