查實喺好多手機網已經出現大大小小討論串，七嘴八舌談論應否繼續真金白銀用PCCW嘅3G，暫時所見正反意見比例相若，不過唔知大家有冇印象，自從PCCW正式推出「3G優先試」計劃，至今已經有8個月！踏入9月，PCCW用戶無論鍾唔鍾意個Service，都要作出決定──仲用唔用好？如選擇繼續，講明部華為U636就歸你，另外要簽約12個月；決定唔用嘅話，當然係有借有還啦！小記曾經打上CS查詢，佢話如果選用最平月費，只係$98，內容包括網內外各2,000分鐘，視像通話（VC）200分鐘，另加MMS、SMS無限任用，聽落都幾抵！不過，網外收費全部另計，好似VC每分鐘就收2蚊，SMS、MMS分別每個$0.8及$2，想平玩PCCW3G，擺明焗住同台先至抵！當然，上台唔只月費有優惠，出機都有着數，例如最新火紅色K610i就賣$1,288，而獨家U526更低至$1,188，用過華為嘅朋友曾大讚上代U636鈴聲夠響，唔知新機又點呢？