當年今日

  國泰送機票除笨有精 - 李八方

蘋果日報 2002/01/27 00:00


前日國泰宣布送出萬張機票畀本港市民在海外的親友,希望拋磚引玉,令外地旅客覺得有着數,來港消費多啲。雖然話成本以千萬元計,但八方計落,呢個宣傳令國泰個名不但遍及全港,更去到全球四大洲,一啲都唔算貴,簡直超值!
這次大抽獎國泰員工亦有權參加,國泰方面就話因為員工一向為公司付出很多,呢次有着數一於預埋佢哋,不過就保證會有核數師在場監察,絕對唔會偏私。國泰就講到全公司上下好齊心,但八方就發現一個漏洞:當日台上幫手宣傳的三位機師,兩男一女都是清一色華裔,佔公司好大比重的鬼佬機師影都冇隻。
當記者好多餘咁問係咪代表管理層同外籍機師關係仍然緊張,陳南祿同身後班宣傳大員反應一絕,不約而同「哈」一聲失笑。收到,心照。不過陳南祿都例牌解釋,話因為活動用中文進行較適合,所以冇搵外籍機師。其實活動重有何禮泰同唐寶麟等外籍人士,好多時都要司儀Nicam廣播。但聽古唔好駁古,只要到時班外籍機師唔好又罷駛,等外國旅客都知道「國泰工潮」的大名就算數。
(圖)到地鐵站領取表格的簡小姐認為,送機票係做宣傳,會刺激吓經濟。


E-mail:[email protected]