韓國女團KARA嘅27歲前成員具荷拉，上周因涉嫌毆打27歲髮型師男友A某而驚動到警方。A某報警時稱遭具荷拉毆打，不過具荷拉就表示係A某醉酒後先動手，之後雙方發生肢體衝突。A某日前接受訪問，公開自己面部嘅傷痕。

而具荷拉亦接受韓媒《Dispatch》嘅訪問，公開自己嘅受傷照及檢查報告，又詳述當日嘅細節。對於具荷拉嘅訪問內容，A某強調有不真實內容，所以唔打算與女方進行和解，並於今日韓國時間晚上9點現身江南警署接受調查。

具荷拉男友以全黑打扮、戴住帽及口罩現身，與律師一齊到達警署，而面上嘅傷痕亦有用膠布貼住。被問到點解突然決定今日到警署受查，A某指：「因為《Dispatch》嘅訪問中有不真實內容，而且想盡快得知相關婦產科診斷中嘅內容。」隨後被追問係咪佢率先動手打具荷拉，A某就僅表示：「關於呢部分會喺之後嘅調查中說明。」

另外，江南警署方面透露，具荷拉將於韓國時間聽日下午3點，喺律師陪同下到警署接受調查。

精選韓流，喺晒《娛果》
http://fb.com/appledailyent