人物：陳文媛

時間：2000年9月24日

地點：銅鑼灣

經過：陳文媛（BoBo）初出道時，唔單止因為同陳冠希傳緋聞而成為傳媒焦點，佢仲試過當眾露點而聲名大噪！2000年9月24號，BoBo以影壇新人身份出席新片《IDo》記者會，同官恩娜、樂基兒以行catwalk形式出場，當時BoBo以透視裝內襯tubetop打底示人，唔知點解佢件tubetop突然下滑，胸前兩點若隱若現，仲露足3分鐘，全場嘩然，場面真係尷尬到暈。

藉陳冠希升人氣

BoBo事後接受傳媒訪問時話：「我都唔知走光，後來助手走埋嚟同我講，先知衰咗，件衫係佢哋（電影公司）安排畀我，我嚟到先至換，唔知件衫咁滑，事前都冇做乜嘢防走光措施，我冇呢方面經驗㗎。」所謂經一事長一智，BoBo日後出席活動自然小心好多。不過，01年佢同陳冠希傳緋聞，人氣大升，佢出道時嘅露點相亦俾人翻炒再登，當時BoBo話自己冇唔開心，又話嗰次對佢嚟講係一個好好嘅教訓，日後會加倍小心，但自從BoBo04年同陳冠希分手之後，佢嘅人氣隨之下滑，睇怕佢當年露點事件亦會逐漸俾人遺忘！
本欄逢周一至周六刊出