馬丁唔再參選立法會，笑言一隊波打少個人，其他10個球員會更落力，馬丁話口未完，立法會議員足球隊好似聽晒佢話咁，噚日對各國駐港領事聯隊時，做龍門嘅建築、測量、都市規劃界議員劉秀成真係落足力勇救險球，但係就勇過龍墮地受傷，血流披面，更一度昏迷，好彩急救後醒番冇大礙，不過醫生怕佢有後遺症，要佢做腦掃描兼留院觀察。

勇救險球落地撞傷頭

噚日有落場嘅保險界議員兼領隊陳智思同八方講，事發時接近完場，領事隊攻門，劉秀成飛身撲救，雖然成功擋開個波，卻失去平衡成個頭撞落地，跌喺地上一度昏迷，個嘴仲撞傷埋當場流血。領事隊執死雞入咗呢球。
在場人士見狀，即時叫人幫佢急救同call白車，有份落場嘅「大嚿」陳偉業話，劉秀成冇耐就醒番，口部傷勢唔係太嚴重，但由於佢清醒後話唔記得點受傷，大家擔心佢腦震盪，所以要佢去醫院檢查。劉秀成送院時表示冇大礙，仲講笑話自己一把年紀，動作冇咁敏捷所以掛彩，「後生嗰陣，點會咁易受傷？」
劉秀成今年54歲，真係唔後生㗎喇，如果佢聽馬丁話，早啲退下火線做塘邊鶴，噚日咪唔使血濺球場囉。八方希望佢早日康復，立法會足球隊下個月仲有一場波踢，希望佢踢埋先考慮掛靴。

陳智思嘆領隊唔易做

劉秀成認老，大嚿都話馬丁講得啱，事關現任議員平均年紀超過57歲，如果冇新血加入，下屆真係變成元老隊，「我91年做議員，30幾歲踢到𠵱家50幾歲，仲邊有咁多氣呀！」
友誼波搞出流血事故，領隊陳智思大嘆黑仔，佢話噚日本來有個後備龍門，不過借咗畀領事隊，所以劉秀成要打足全場，可能體力不繼而出事。陳智思又話領隊唔易做，噚日本來有六個議員出場，結果得佢、大嚿同劉秀成上陣，長毛、高達同鄭家富甩底，佢下屆好似馬丁咁唔選，其他好波之人如楊森又係唔選，擔心立法會球隊後繼無人，隊波仲慘過二、三梯隊未成氣候嘅政黨。不幸中之大幸係劉秀成啲血唔係白流，議員隊噚日大勝領事隊6:4，大嚿個人連入四球，陳智思入一球，另一球由外援建功，交足功課。
mailto:[email protected]