人稱講古佬的雄仔叔叔（阮志雄），演出港台劇《獅子山下2018》首集《定風波》，該集故事改編自銅鑼灣書店店長林榮基，從大陸回港後三日兩夜的經歷。導演陳上城找上阮志雄演繹林榮基，可說是別無他選，他從外形到造型，連認識林榮基的一間書店老闆娘也認錯人，神似度令人讚嘆。對於這個敏感人物的角色，阮志雄最初沒有擔心︰「當時我完全冇考慮咁多，首映之後，我諗吓都驚。」

經常為小朋友、為別人說故事的雄仔叔叔，今次轉換方式，透過他的演出來說別人的故事。日前他接受《蘋果》專訪，細訴首次演出《獅子山下2018》的感受，他說︰「短片演出真係第一次，之前都有做過吓演出，發覺自己唔適合做演員。導演陳上城搵我，話我唔係一碌木，佢會指導我去演。」最初他答應演出時，沒想太多︰「我冇諗得太複雜，我係有擔心，擔心演得唔好破壞咗套劇，其實唯一擔心自己身體唔係咁好。」

外型瘦削、戴眼鏡的阮志雄，確實跟林榮基有幾分相似，他說︰「林生嘅新聞我當然有睇，不過今次唔需要跟足佢嘅行為舉止嚟演。有一晚喺書店拍攝，間書店老闆娘認識林生，有個鏡頭要我行落樓梯，老闆娘見到我以為我係林生。拍之前我同林生見過兩次面，雖然佢有咁嘅經歷，但其實佢個人好活潑。」

早前舉行的首映會上，有人問阮志雄對於林榮基的經歷是否感到好震撼？他表示︰「當時我諗唔到點回應，事後我諗番其實好簡單，試想吓坐响我隔離嘅人（指林榮基），畀人困咗8個月，唔知可唔可以出番嚟，而罪名係欲加之罪。喺文明社會佢只係做出版業，對政權又有幾大睇法同批評呢？對佢畀人困住間房8個月，我係好震撼。」

說起有一場戲，是講述林榮基與李波（另一位銅鑼灣書店老闆）的對話，阮志雄好記得這一幕，他說︰「劇入面嘅李波同我講，『交番部電腦就冇事o架啦！』我問，真係冇事？就算冇事都出賣咗讀者。拍呢場戲之前，我正上緊網睇到劉霞上飛機嘅新聞（今年7月10日），當時我好激動，但我未有即刻同劇組講呢個消息，我壓抑住情緒拍埋場戲，講對白時我仲有少少口震，good take之後我先同大家講呢個消息。林榮基困咗8個月，劉霞軟禁咗8年，劉曉波就更長直到佢死，但係呢啲事都會不斷係我哋身邊出現。」據了解拍攝這個敏感題材，導演常碰釘，有演員不敢接，有場地不敢借，阮志雄說︰「我知道佢哋搵酒店睇過幾間，唔係話full晒，就話唔方便。」

當前的香港，選舉自由及言論自由逐步被衝擊，阮志雄幸有些人的堅持︰「我哋睇到啲嘢越來越埋身，因為我哋面對操控性嘅政權，而權力中心揸得好緊，條紅線就越來越前。」原本不怕，但現在怕，阮志雄怕什麼呢？他說︰「最初我係冇諗得咁複雜，首映之後我諗吓都驚，但驚得嚟係健康嘅情緒。你驚先至會去避難，盡量令自己唔好身陷險境。」問他會否擔心影響家人？他說︰「我哋做任何嘢，當政情要對準你，一定會連累家人。」對於港台《獅》劇，仍可以拍攝、探討一些政治話題，阮志雄坦言︰「下一輯仲有冇機會拍，真係唔知。」對於任何事阮志雄都以平常心面對，「畢竟我都65歲，搭車都只係2蚊雞，哈哈哈！。」

採訪︰羅婉玲

精選娛聞，喺晒《娛果》
http://fb.com/appledailyent