MK POP始祖E-kids相隔14年再拍MV，噚晚更佔領旺角一段街頭為新歌《一二三四》拍攝，並準時晚上八點完成，全部人拍手叫好，亦吸引近二百人圍觀。

Tommy笑話今次真係好冒險佔旺跟大媽打對台，而明知不能硬碰擺地方唱，佢哋就用正途向路政署申請封路。Alan一直擔心天雨，事先買咗衣紙燒拜同上天講數，Tommy笑指如果一拍就落雨，證明E-kids可以收皮。

MV投資六位數拍攝，背後黑武士係睇完佢哋演唱會後，主動洽談開工作室幫佢哋做歌，佢哋話：「起初啲人叫我哋捨難取易唱慢歌，賣靚仔，但我哋想堅持做跳舞，香港唔止草蜢。」原先計劃三首歌到巴黎、日本同泰國拍攝MV，但佢哋覺得被稱為MK始祖，冇理由第一首歌唔佔旺角，之後等埋阿Tim 嗰BB出世，約八月到日本拍第二首歌MV，明年初再開騷。