惡搞歌《補貼屋》除歌詞寫實外，好多網民都大讚唱得有功架、有感情，原來擁有呢把靚聲嘅80後青年Philip，係行內俗稱「唱Demo」嘅歌手，因此達專業水準，而佢嘅正職則係地產經紀，見證樓價狂升，難怪演繹得咁投入喇！

「好多嘢事在人為」

作曲、填詞人創作一首流行曲後，會搵幕後歌手唱一個試聽版，即係「唱Demo」，再將錄音交畀唱片公司試聽。Philip有多年「唱Demo」經驗，唱功紮實，比好多偶像派歌手好，講到唱《補貼屋》，Philip話越唱越投入：「首歌好寫實，我哋呢一代要買樓真係好困難。」
不過難還難，Philip睇住好多80後客人買樓上車，「有啲人好叻仔，唔使屋企人幫，一樣有辦法，證明好多嘢都係事在人為」。雖然越唱越心酸，但Philip話歌詞激發佢要更努力搵銀，「我想買樓，唔係買一層，仲要買好多層！我覺得喺香港唔會冇機會，唔係一定要政府幫」。