應屆英超亞軍熱刺周二喺國冠盃美國賽區火併羅馬，上半場先被柏洛迪12碼攻破大門，換邊後輪到守將奇雲雲馬解圍變助攻，set好炮台畀羅馬土耳其新兵辛基斯安達射成2:0；雖然熱刺喺87同90分鐘接連憑哈利雲克斯同雲遜贊臣各入一粒追平2:2，點知補時俾對手小將杜米尼路（Marco Tumminello）有犯規之嫌後撞射入網，結果熱刺輸2:3，國冠盃兩戰一勝一負，周六會對曼城，羅馬就會喺下周一對祖雲達斯。

雖然熱刺呢場陣容叫做誠意十足，其中卡尼同迪利阿里踢足大半場，但眼見英超勁敵瘋狂增兵，熱刺至今仍然按兵不動，仲以5,000萬鎊將基爾獲加放予曼城，令唔少球迷擔心來季前途。不過，熱刺主席利維就好有骨氣，揚言要堅持一貫轉會政策：「我哋有責任適當地管理球會，目前有部份行為根本冇可能持續下去，有人入不敷支超過兩億鎊，你唔可以咁樣繼續落去。」

利維亦表示斥資7.5億鎊建造嘅新球場唔會對增兵造成影響，又表示領隊普捷天奴對球會青訓產品充滿信心，一旦市場上搵唔到適當人選，願意給予機會小將發揮。最新消息係熱刺有意向來年同德甲賀芬咸約滿嘅22歲德國小國腳謝利美杜利安招手，至於翼鋒拉美拿就有可能過檔國際米蘭。