婚後李亞男今日首次喺香港出席活動，大會更安排部份角度似「王祖藍」嘅咖啡師，教亞男沖咖啡。

亞男喺台上更多次被主持讚係模範人妻，亞男喺接受訪問時，佢話自己擅長煮西餐，煮中餐就唔太拿手，因為佢婚後同奶奶及祖藍妹妹一齊住，閒時亞男都有陪奶奶去買餸，自己都有幫手整吓，不過奶奶多數叫外傭做，亞男更坦言佢哋婆媳關係唔錯，佢就話祖藍成日要去內地工作，冇咩機會一家人一齊食飯，祖藍妹妹都經常出街。

人妻亞男更大爆自己喺屋企愛著背心短褲，亞男笑指：「如果祖藍舅父冼偉智上去，就要即刻入房換過件衫。」被問老公王祖藍婚前仲係處男，婚後佢哋係唔係不設防造人，亞男解釋：「唔會咁快生，因為大家都好忙，唔想大家冇咩二人世界就有BB，感覺會有啲遺憾。」講到日前佢上去內地節目《奔跑吧兄弟》探班，亞男自拍咗一張素顏相，被網民大讚好靚一事，亞男講：「係因為等到好無聊，有見到祖藍一班兄弟，之前婚宴有請一班兄弟，不過佢哋都忙，今次鄧超有請佢哋食飯。」

問及覺唔覺頭先教咖啡師似老公祖藍，亞男就話:「身高似啫，喺我心目中，我老公最有型。」嘩，冧死人咩!