【智取大市】中美封牌一個月(晉佳)
智取大市中美貿易戰晉佳
中國商務部將會建立「不可靠實體清單」,係自美國制裁華為之後嘅一大反擊招數,亦係令科技戰可以無限想像嘅一單消息,自不然有人會睇成未來手機零件可能進入完全embargo狀況。但正如本欄早前提過,不能忽視美國喺呢場科技戰之中付出嘅代價,因此美國敢去到有幾盡?未必是世界末日。
而家仲講五窮六絕七翻身?6月28日至29日嘅G20峯會先至係重要時間表,市場估G20中美談判無成果,睇法略為負面,冇期望就冇失望,係好事。
目前情況好似賭神高進同新加坡賭王陳金城嘅賭局,美國選擇抵制華為「晒冷」,中國一聲「跟你!」而家去到6月尾之前,就等如陳金城嗌一句「封牌!揸個水先!」呢接近一個月,壞消息照計要封一封頂,等下一刻埋枱再傾,當然中間會有零碎嘅消息擾亂投資者。
G20峯會各國元首各懷鬼胎,但大抵希望兩個大國學似舊年12月擺場和頭酒。港股形勢喺未來一個月無大變化,就係兩極化情況會持續,最受累自然繼續沽,強者又會越強,例如平保(2318)、頤海(1579)、澳優(1717)、亞泥(743)等等能照升如儀,相信不乏破頂股,睇住恒指意義不大。
講到呢度,香港樓市資本確實利害,係逃犯條例修訂以至科技戰當前,都穩如泰山,不禁令人疑惑,CCL最終究竟可以升到邊度去?真不能估頂。
晉佳
https://www.facebook.com/advanceguy1
【六四30】守住歷史 拒絕遺忘
https://hk.adai.ly/zdzKtt2RiW