近年日本嘅劇集《幪面超人》成功捧咗唔少靚仔偶像出嚟,好似人氣蓋過妻夫木聰嘅小田切讓、新一代妖男極品須賀貴匡同師奶殺手要潤,都係唔同嘅《幪面超人》主角。
演異能學生妹
𠵱家喺日本播緊嘅《幪面超人555》,除咗有被喻為「超人界木村拓哉」嘅靚仔主角半田健人之外,亦有位扮佢朋友、十八歲卜卜脆嘅女角加藤美佳,佢身材好掂,重趁勢殺入寫真界。
美佳喺《555》入面,扮演有超能力嘅學生妹長田結花,咪睇佢喺劇中成日着校服,以為佢冇料到,我羅拉見佢近排喺日本多本雜誌公開比堅尼寫真,真係令人眼前一亮。
三圍32.5、22、34.5嘅美佳,雖然個躉大過胸,但整體身形都算標青,個樣又有鄰家女孩嘅親切感。美佳知道呢排日本啲叔叔同哥哥仔,好迷妹妹feel嘅青春偶像,所以佢亦加入呢個「戀妹熱潮」,推出處女寫真集《Leilani》。
曾夥拍MEGUMI
我羅拉已經起埋美佳個底,原來佢上年同MEGUMI組成過水着組合ASAHI-TVANGELEYE,難怪佢拍性感寫真咁自然同有自信啦!