港股昨日有479隻正股上升,478隻正股下跌,但係恒指就升咗361點,仲創埋新高,咁大家應該明白所謂「大市」係乜嘢,就係恒指成份股嘅表現,仲要係大隻嗰啲。
中移動(941)加地產股加埋幾隻國內保險股,掂晒,炒高幾隻股份,恒指就可以直撲25000關,𠵱家個遊戲就係咁玩,第日要插個市,掉轉做就得嘞?
花旗嗰邊炒減息炒到癲,股市升得好有勢,喺咪真係減就唔知,但係香港銀行公會開完會就預花旗減1/4厘至半厘,仲話如果拆息落番啲,有可能跟減息。
國內呢?通脹咁勁,市場預咗佢加息,昨日收市之後,人行宣佈加息0.27厘,算係好溫和,並冇加雙倍,國企股昨日炒咗上嚟,下禮拜一應該可以繼續炒上去。