年底四大樂壇頒獎禮將近，據聞年年都好有體育精神、唔介意俾人話佢恨攞獎嘅劉德華，今年打算四個頒獎禮都唔去，佢一向缺席商台頒獎禮，而新城頒獎禮喺下月26號舉行，但係華仔因為喺紅館開緊演唱會，有傳新城打算為咗佢提早開騷，仲特登搵人入紅館頒獎畀華仔，但華仔方面要睇個唱節目安排，未覆實得唔得。
不過，華仔喺無綫《勁歌》頒獎禮攞咗七屆「亞太區最受歡迎香港男歌星」獎，喺唔出席冇獎攞嘅原則下，唔知邊個做到華仔「接班人」攞呢個獎呢？

Sammi贏頭彩

雖然缺席四大頒獎禮，但香港電台十大中文金曲頒獎禮適逢今屆30周年，佢哋以「金曲三十」為主題炮製一首未定名嘅新歌，由許冠傑作曲、黃偉文填詞，華仔答應同阿Sam合唱，港台仲諗住搵埋張學友，而首歌亦有第二個版本由李克勤、古巨基、陳奕迅同埋容祖兒一齊唱。港台頒獎禮將於明年1月19號喺紅館舉行，製作總監周國豐噚日公佈今年到目前為止最高播放率嘅歌手名單，包括古巨基、陳奕迅、張敬軒、容祖兒、衞蘭同鄭秀文（Sammi），其中Sammi只得兩首派台歌，都躋身女歌手三甲，反而楊千嬅雖然係入圍金曲最多女歌手之一，但都冇Sammi咁勁。