許冠傑復出，在紅館開演唱會，果然轟動，由八點十五分唱到午夜十二點半，體力驚人，唔到你唔服。惡佬明等一行十幾人去捧場，下午六點就到尖東「利苑」食晚飯，七點九行上去紅館，唔記得買蒸餾水帶上去飲，勢估唔到在館內坐足二百七十五分鐘，十一點之後又餓又渴，散場後覺得好辛苦，惟有撲過去「大都會酒店」飲「早茶」，飲完茶返屋企上床，已經係早上兩點後。第二日去馬場捧「美聯物業盃」場，跑跑吓馬就瞌眼瞓，卒之輸錢離場。
惡佬明話在場歌迷反應熱烈，但一啲四十歲以下嘅觀眾似乎覺得冇咁投入。難怪嘅，阿Sam喺一九六幾年就出道，當年出世嘅，𠵱家先至得三十八、三十九歲，佢哋對劉德華、張學友就比較熟悉啲。

不過五十歲或以上之人，就聽得非常興奮，李麗娟、李鵬飛、周文耀、蘇澤光等名人，全場眉飛色舞。李麗娟與阿Sam係港大同屆同學，周文耀、蘇澤光與阿Sam係利瑪竇堂堂友。大編輯聽蘇澤光在飯局上講過，利瑪竇堂啲大仙（seniors）當年玩新生，要阿Sam入佢哋房彈結他唱歌，玩得好不高興。眨吓眼三十幾年過去，積蘇成為當紅CEO，阿Sam成為復出嘅歌神，張永霖（亦係利瑪竇堂宿生）成為退隱嘅「青樓名妓」，你話人生幾易過呢；而三十年之間，乜嘢事都可以發生，係事先冇法子預計得到嘅，大家繼續微笑可也。