當年今日
關於我們

【杜汶澤代發律師信】李力持公開指控拍性愛片 盧覓雪要求道歉兼賠償

蘋果日報 2020/03/17 18:30

盧覓雪杜汶澤李力持

藍絲愛國導演李力持日前在facebook上載盧覓雪的相片,並配以一張性愛片截圖,用嘔吐公仔圖案打格,指名道姓寫住:「黃屍盧覓雪遺失電話同臭鬼性愛片流出,她是傳媒人,亦做開杜曱甴喱騷,見到都唔開謂(胃),睇咗一秒想嘔。」不過,這條性愛片是5年前的舊聞,當年盧覓雪已親口否認是片中人。
由於李力持的貼文言之鑿鑿,涉誹謗成份,而盧覓雪是杜汶澤網台「喱騷」的節目主持,「喱騷」今日在官網發聲明:「早前李力持於Facebook發表兩則貼文,涉嫌誹謗及惡意以虛假言論攻擊本台旗下藝人盧覓雪小姐。本台已委托律師正式發律師信畀李力持,要求佢立即停止一切誹謗及失實言論,並且向本台代表律師透露有關言論曾經向何許人事發佈,並提供證據證明,並且需要按盧小姐要求向公眾澄清以公開形式收回有關言論及作出道歉聲明,並承諾不再重複有關言論及支付盧小姐一切損失及律師費用。」
盧覓雪接受《蘋果》電話訪問表示:「3月11日朝早,我睇facebook睇到李力持po舊聞,但佢好清楚咁寫關於係我嘅性愛短片,條片係5年前,佢就話條片係我,有啲字眼好差好惡劣,我睇完好唔開心,點解佢要咁做!佢令到我好困擾,仲要我唔同嘅親戚朋友,美國、澳門、香港好多朋友問候我,搞到我不勝其煩想死,因為佢寫得太確鑿,所有人都當係我。我真係好嬲,我要睇心理醫生,你唔好當呢啲冇事,我都覺得自己有冇咁誇張,但到發生時,我真係唔想望到嗰啲人,但我冇理由唔落街,佢已經騷擾我生活,要同親戚朋友解釋好花時間,好彩呢排少嘢做。」
盧覓雪指阿澤知道後,立即幫她出頭,「大家商量完,用法律途徑攞番清白。我已經要睇心理醫生平衡自己,好困擾,行出街啲人望住我,係咪覺得當我係嗰條女,5年前我可以好輕鬆答呢件事,但今次好受傷,朋友都當咗我係受害者,當嗰個人係我,5年前都仲問嗰個係咪我,仲有個空間,但而家啲人:『你冇嘢嘛?唔好唔開心啦!』我真係覺得點可能呀,黐線,而家行出街啲人望我,死啦,係咪見到晒我所有嘢,我直頭暈暈哋!」
盧覓雪決定用法律行動解決,「第一件事要佢公開道歉,呢樣好基本,第二要佢賠償我睇醫生嘅金錢,呢樣唔係好重要,佢欠我一個公道、道歉,一個女人嘅名譽,點解你要咁做,如果條片係真係我,我冇嘢好講,我做得出我又唔怕你咁做,但而家硬加諸我身上,點解會咁,我直情崩潰到爆炸,好憤怒!」
盧覓雪亦在fb反擊李力持:「終於明白杜汶澤每次喺#喱騷 一講起李力持就媽媽連聲,原來真係抵X!拎一宗成五年前的舊聞嚟抹黑、侮辱、污衊我,惟有套用佢哋班藍屍偶像PK Tang嘅講法講一次:「有啲人好似係如獲至寶,好似發現一個天大醜聞咁樣,實情嗰個根本唔L係我吖,我DXXM,識唔L識fact....」
杜汶澤則以短訊回覆《蘋果》:「由於已經交咗畀律師處理,其他嘢都唔方便講咁多,更加唔想將件事去詳細描述,免得對盧覓雪造成二次傷害。成件事應該係因為當事人發佈咗一啲不實嘅訊息。」
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
empty
(FB圖片、IG圖片、資料圖片)
empty
李力持早前出post指性愛片女主角是盧覓雪,更指睇到想嘔。(FB圖片)
empty
盧覓雪cap圖搜證,並在FB爆粗鬧爆。(FB圖片)
empty
《喱騷》其後表示會發律師信給李力持提告。(IG圖片)
empty
盧覓雪之後再指,發現自己與李力持有共同朋友,決定全數unfriend。(FB圖片)