人氣女將蔣嘉琦這天於第三場四班1200米，勝出文家良馬房的「帝豪寶貝」，延續她的神奇之旅。
嘉琦BB勝出「帝豪寶貝」後，已經連續贏到第十次賽事，季內累積27Win，比26Win的楊明綸多一場，榮登華人騎師一姐；拋離師兄黃皓楠8Win，比13屆冠軍韋達只少兩win，走勢好勁。
「帝豪寶貝」同雷神八字唔夾，上次由佢騎番大熱第五，呢勻換嘉琦BB減七磅，表現大躍進，於1200米途程上取得今季第二捷，兼帶挈落飛黨贏大錢，事關此駒閘前落飛，跌到5.6倍着綠燈次熱開跑，結果輕勝個多身位而回，組合獨贏A2派29元正。
今場兩匹後上馬「慣勝聆聽」同「順其自然」分取二、三名；大熱門「勝利名星」守好位拉士衝落唔多，被對手超越而跑梗頸四，馬主施偉強唔能夠連同昨日於澳門贏「勝利巨星」而包辦一口港澳孖寶，四重彩派二萬二千幾。
方嘉柏與柏寶今季合作五匹大熱門「自動導航」、「御綵」、「快快贏」及「勝利名星」（兩次）全部三甲不入。而蔡廐今季兩匹起用何澤堯之初出馬「乘勢好運」及「慣勝聆聽」均上名，「乘勢好運」再出改配洋將即贏馬補中，「慣勝聆聽」下次若加強配搭可追捧。