中美冷戰2020，終於選擇喺香港正面交鋒，中國先推「港版國安法」，然後美國還擊，宣佈即日起撤港特殊地位，同時停向香港輸出受管制國防裝備。

至於我哋特首林鄭就厲害了！今朝見記者聲如洪鐘，「任何制裁行動都不會嚇怕我們！」說起來，實在振奮人心，聽到我眼泛起激動的淚光。佢仲強調，美國長期喺香港貿易順差有成300億美金一年，言下之意，再次點醒老美：「美國這樣做只會徒勞無功，損害自身利益，死開啦！」

雖然唔怕，但我哋實在不能輕敵，既然林鄭再一次提貿易順差呢粒數，咁我又再一次強調：香港上年出口連轉口至美國貨值係3040.04億元，佔整體7.6%，排行緊隨中國之後，排第二位。

我信政府！唔怕！中國實力雄厚！我睇死美國玩唔到幾大！不過呢……今次蓬佩奧就國防裝備限制措施，提到一個重點：「我實在分唔到，呢啲受管制物品，到底係出口去香港定係中國。我哋不能令呢啲物品，落入解放軍手中。」咁又唔怪得人，一國一制了，中港一家親，真係好難分。

利用呢個point去搞亂香港，狡猾的美國亦唔係第一次玩。想當年韓戰爆發，美國及聯合國對華實施禁運，當年有幾狠，咁就要講返隻臘鴨。

當時啲臘鴨係就係made in HK，啲鴨亦係喺香港出世，拎到香港身份證㗎！但美國就問，「咁啲鴨蛋呢？」的確，問到肉了！其實鴨蛋係來自中國。前港督葛量洪喺回憶錄就講過，「咁呢啲鴨，算係共產主義鴨，定係地道嘅英國鴨呢？」

英美雙方結果為臘鴨多次通信，終於定到解決方法，就係孵蛋時要有檢查人員在場，鴨BB一出世，就喺腳上蓋印，鴨子長大後再另加記號，之後先可以劏鴨、曬乾，再運去美國。

至於蝦都有類似情況，蝦冇錯係香港水域捕獲，但甲殼類動物，究竟有冇共黨分子「滲透」？由於確定唔到蝦來源地，所以當時香港蝦，一律禁止出口到美國。

可惡的老美，竟然破壞公平貿易原則，以前就擾亂臘鴨市場，而家就擾亂科技市場！不過又咁講，原來老美認真玩起上嚟，單係玩臘鴨、玩蝦都可以玩死你！蝦蝦蝦！冇事嘅，除非老美玩到咁大嘅啫，否則偉大的林鄭領導下，任何制裁都唔怕！唔驚！有國安法，家家保心安！

話時話，印度DHL本月公佈，停收中港澳貨10天，市場分析就話，正正就因為啲貨好大機會係「中國製造」，所以唔准運。都係嗰句啦，有國安法，國泰民安，歌舞昇平，今晚去食飯叫隻臘鴨賀賀佢！

by千頌C@堆填區
http://fb.com/winbigwok