鍾欣潼(阿嬌)同「醫界男神」之稱嘅賴弘國(Michael)凌晨（美國時間5月25號）搞pre-wedding party。Party於美國洛杉磯當地一間近百年歷史五星級酒店Millennium Biltmore Hotel Los Angeles舉行，由於係pre-wedding party，所以現場冇接新娘環節，亦冇上頭同簽字註冊等儀式，場地佈置以大量紫色及粉紅色鮮花為主，正中央搭建一個T形台，台上放滿蠟燭，散出浪漫氣氛。

Party宴請約60個親友，包括阿嬌母親、妹妹、表姐、賴弘國父母及親友、經理人霍汶希、契爺劉鎮偉夫婦及好友何超蓮等，容祖兒、蔡卓妍(Sa)及鄭希怡(Yumiko)做姊妹，花仔花女就係Yumiko囡囡梁浸浸及阿嬌契仔。

每位來賓進場嗰陣，工作人員會為佢哋綁上印有阿嬌英文名「Gillian」及賴弘國英文名「Michael」縮寫嘅「G&M」字樣絲帶，女賓客係粉紅色，而男賓客係灰色；午宴分為四道菜式，清雞湯、上湯龍蝦、心型牛扒同甜蜜湯圓，每位賓客碟上除咗擺放寫有賓客名字嘅卡片，仲有一枝玫瑰花。

由細湊到阿嬌大嘅經理人Mani打頭陣喺台上講：「以往都係我哋『龍虎豹蛇』照顧佢，但今日好開心，多咗個人照顧阿嬌，交俾你（賴弘國）啦！我哋可以休息吓啦。阿Sa同阿嬌成長咁多年，我見證阿Sa同阿嬌由小朋友到而家，今日阿嬌……我都好開心，幸福你係一定要擁有！你係好值得擁有呢個幸福㗎。」