近十多年，IT界出現無數創業神話，先是科網，繼而是社交網，然後就到app。最近，GoGoVan更被注資5,000萬，老細之一的Steven，30歲未夠便已坐擁半億資金，怎不教人羨慕？難怪就連富二代陳姿允亦有華爾街銀行唔做，轉行做app。然而他們都認為想成功就要"enjoy"，決不能只是向錢看。

「錢唔係入自己袋！」StevenLam一再強調：「錢都用於公司發展，加上我們免費提供服務，其實一蚊都未賺過！」以兩萬蚊創業，試過霉到一支水三人分，到如今衝出香港走入新加坡及東南亞，成績有目共睹。雖然謙稱未算成功，亦不願透露中文全名，但他也分享了一些心得，「不要以賺錢為前提，要真心喜歡及享受，其次所設計的app要能真正解決問題。」

他以自己為例，「起初做飯盒廣告生意，常常冇車送貨，因而創立GoGoVan來解決客人與司機的錯配問題，心想就算冇人用個app，自己用都得。後來成功幫到客人搵車，成功感很大，便想如何做很更好。」免費服務亦是關鍵：「起初打算用幾個月後便收錢，始終好難唔賺錢做落去，好彩後來得到注資，投資者亦強調先不要向用戶收費，因為大趨勢是要取得更大的客戶群，擴大市場佔有率，並讓用戶養成習慣，才慢慢收費都未遲，WhatsApp便是個好例子。」