莫雷拉上周日（5日）田戰創造一日八捷神蹟，剛周三（8日）谷戰也有一W。周日（12日）回師沙田，雷神又手握重兵，相信又可連場數糊。

雷神經常一場馬有多駒可揀，他在第四場四班1400米其實有「甜統」、「育成寶貝」可揀，最終對賀賢馬房「福愛寶」念念不忘，睇得出雷神很想為此馬贏番場交代。

事實上，「福愛寶」最服莫雷拉一人，對上兩季在四班取得兩W，均由雷神一手包辦，大牌騎師如潘頓、郭能及柏寶騎過都唔識入Q。

今季頭五仗由其他騎師主轡，以大前仗配郭能跑到第三，表現已算係較好一次。上場重配雷神，立即於1400米追得一席季軍，如非抽排13檔焗留，相信會有更佳演出，至今人馬合作六次取得兩冠兩季，相當夾檔。

亦有一點不可不提，「福愛寶」今季總欠缺抽檔運，近五仗跑轉彎賽均抽排9檔或以外，今次雷神唔肯放手，終於等到抽4檔，情況似足賀賢另一駒「英姿茂盛」，後駒季內數度配雷神排中外檔搏輸，最近抽1檔即在其胯下開糊。

種種有利因素夾啱，今場「福愛寶」有機會成為「英姿茂盛」的翻版，在雷神胯下勇冠群雄。