就係今日喇！

ViuTV新劇《詭探》前傳今日終於宣佈「神秘卡士」——冇錯，如果你已經睇咗前文，應知道答案就係鄭少秋。

一星期ViuTV已於fb出post，俾四個大家估，其中一個係秋官，另外三個係徐錦江、謝賢同劉松仁，仲話今日開估。今午記招上，先由飾演年輕版邵仲衡嘅游學修、大師兄尹揚明年輕版嘅麥子樂，以及車保羅年輕版嘅陳安立一出場跳番part舞，閃耀燈光再突然「眼前一黑」，然後身穿白色西裝外套嘅秋官就「太陽出來了」！

秋官一出場就提氣話：「大家好！我就係師傅！」三位徒弟都乖乖嗌師傅，秋官都點頭讚：「乖！」飾演大師兄嘅麥子樂笑言之前同秋官合作過，但向對方提起此事時，對方完不記得。麥子樂溫馨提示：「我最後嗰部劇，關於打桌球嘅，我係後面企……六七線後面，做啲觀眾咁樣。」秋官此時話：「你最叻係六個cushion入袋。」秋官係屠龍cue吖！至於飾演年輕版八爺嘅陳立安，之前為取經，特地入元朗搵車保羅飲茶傾下偈學兩招，他笑言：「見到佢先發現我哋真係一模一樣高。係1cm都冇差到。」

秋官話，今次接拍Viutv劇集，《詭探前傳》係因為天時地利人和加上緣份。但live期間，不少網民見到原來係秋官，都既驚且喜，喜嘅係可以再欣賞到秋官精湛演技，但驚嘅係丁蟹效應…

彭師傅呢個角色，學司儀話齋，亦中亦西而且博學多材，秋官就咁樣自我介紹：「呢個角色好好玩嘅，其實我係一個哲學教授嚟嘅，係一個智者，佢醉心追求世界嘅真理。演呢個角色要有學養，又要有智慧，瀟灑得嚟又要不失穩重。除咗同呢幾個徒弟有互動之外，彭師傅呢個角色都有好深刻個人經歷。」關事就大賣關子。

咁造型會點呢？「又瀟灑又有型，又有啲超時代感覺，有啲Star War大師風範。」即係點呢？大師賣咗好多關子……因為套劇都未開拍0架嘛。