不過,Tonyy就指出,中銀都未必次次都咁少人排隊,有次佢就排隊排到出門口,足足等咗成粒鐘。至於滙豐嘅兄弟恒生,就被網友批評收費貴,利息又低,服務態度變差。所以,hk1618hk就話永隆好用,覺得「平靚正」,服務好,又少人排隊。
而網友白白淨淨就話,滙豐嘅服務都唔係咁差,只係衰「食水深」,好似外幣滙價;佢仲指今次銀行選舉有所誤導,因為大部份人都無可能用過晒咁多間銀行,咁又點分邊間好,邊間唔好;以小市民嘅心態,一定會話自己用緊個間唔好,所以最多人用個間銀行就一定係最多人話唔好。而且,如果滙豐真係咁差,又邊度有咁多人去幫襯?因為貪佢夠大及可靠。
但lsk_grey就從另一個角度睇,如果多人用嘅銀行,又有咁多人都唔滿意佢哋嘅服務,咁間銀行就真係好有問題!