白鴿黨南區區議員區諾軒今日喺鴨脷洲利東社區會堂，搞咗個名叫「情牽仲夏夢」嘅粵曲活動，當中個「夏」字，原來係指「夏蕙BB」黃夏蕙。區諾軒話，今次其實已係第二次請夏蕙BB為街坊表現，今日夏蕙BB表演咗「禪院鐘聲」一曲，台下二百幾個座位坐無虛席，唔少街坊都讚夏蕙BB唱歌「好好聽」、「好掂」，仲捉住佢不停合照。

區諾軒仲同八方講，自己都算係夏蕙BB粉絲，自爆不時都有同沈旭輝交流夏蕙BB嘅最新消息，覺得夏蕙BB最犀利嘅地方係，雖然佢年紀唔細，但仍然好有心服務社區，平日都去唔同大小地方唱歌同探訪老人家，氹得班老人家好開心。