電影《怪獸與牠們的產地》（Fantastic Beasts and Where to Find Them）全球上映均大收旺場，故事屬《哈利波特》（Harry Potter）嘅前傳，令一眾「哈迷」睇完又再勾起唔少童年回憶。

《怪獸與牠們的產地》由金像影帝艾迪烈柏尼（Eddie Redmayne）扮演神奇動物學家紐特斯卡曼德，佢係霍格華茲嘅舊生，不過因為持有危害他人性命嘅怪獸而被趕出學校，教授阿不思鄧不利多曾極力阻止。今次電影背景從英國搬到大西洋對岸嘅美國，唔止出現好多奇怪生物，更有唔少似曾相識嘅名字；其實《哈利波特：死神的聖物》（Harry Potter and the Deathly Hallows）入面，都有提過《Fantastic Beasts and Where to Find Them》呢本書，妙麗都曾經有睇過當中嘅生物資料。

片商已宣佈會將《怪獸與牠們的產地》拍成五部曲，尊尼狄普（Johnny Depp）飾演「史上最危險黑巫師」蓋勒葛林戴華德（Gellert Grindelwald）係呢個系列嘅終極奸角，首集佢已客串演出，而《死神的聖物》片尾都有提到葛林戴華德，其實喺《哈利波特》小說中都曾有交代佢嘅身份，事關葛林戴華德同鄧不利多曾經係同性密友。不過佢哋長大之後各走極端，葛林戴華德成為超強黑巫師，更被譽為係佛地魔出現前嘅「史上最危險黑巫師」，鄧不利多亦同葛林戴華德戰開生死之戰，呢單新聞喺魔法世界好出名。

喺小說中，葛林戴華德係畀佛地魔殺死，而呢個角色早喺《哈利波特：死神的聖物》已經出現過，哈利波特見到少年版嘅葛林戴華德之外，仲講到佛地魔去搵葛林戴華德一心奪得最強魔杖，小說指佛地魔當知道呢支魔杖並唔喺葛林戴華德手中即大開殺界，而電影版就冇清楚交代到佛地魔有冇殺死葛林戴華德。