兩會開幕在即，京城近日冠蓋雲集，但班達官貴人勢估唔到，今次兩會嘅焦點唔止國家大事，仲有「郭家大事」。噚日班政協開預備會議，賭王何鴻燊會前就郭家大事發表偉論，直指事件絕不能定性為「不愛江山愛美人」，因為與事實不符，仲話：「如果話係美人，我話佢大近視。」
四叔日前大爆阿湘同唐小姐傾心事嘅關係，又妙論富不過三代、六耳不同謀呢等豪門智慧。賭王可能見四叔爆料爆得咁過癮，噚日被採訪兩會班記者問佢點睇阿湘呢個世姪單嘢時，即刻口若懸河，話等陣見到阿湘都會「輕輕勸吓佢」。

寸傳媒大近視

對於個別傳媒將事件形容為「不愛江山愛美人」，有四位太太兼閱女無數嘅賭王斷然指出：「唔係事實。」仲話講「美人」嗰個係大近視，暗指IdaTong唔算美人。有指郭大少當年被綁架獲釋後性情大變，以致與唐小姐再續前緣，賭王噚日亦話，有少少同情阿湘，因為當年張子強勒索嘅對象係新鴻基，而阿湘又係大佬，所以綁佢，唐小姐可能係喺阿湘「康復期」幫到佢。
但對於紅顏知己呢樣嘢喇喎，何博士話「濕濕碎」，建議阿湘「揞番啲畀佢就得」，最緊要係三兄弟和好如初。賭王又成個過來人咁，透露自己都係「俾太太任拎」，仲晒命話何家向來冇乜糾紛是非，仔女「又乖又靚」，亦唔會畀佢哋學「陳冠昌」（八方估應該係講緊陳冠希）。
賭王好似好了解人哋家事，話郭老先生搞清楚晒啲嘢先過身，將辛辛苦苦建立嘅新鴻基王國交畀三個仔，佢哋應該三位一體，但皇太后（即郭老太）始終最威，話晒事。佢奉勸阿湘聽阿媽話，仲話郭老太年紀雖然好似細佢少少，但份人好公道，今次出招叫個仔放假，一啲問題都冇。

四叔突然封口

不過，估計會連任政協常委嘅郭炳湘噚日冇現身，賭王有冇機會曉以大義仲係未知數。四叔噚日亦去到北京，帶班記者參觀旗下地盤時話未見到阿湘，但「過一、兩日可能見吓面，寒暄吓，食吓飯，傾吓偈。」傳媒追問佢哋會唔會傾新地問題時，恒地副主席林高演即刻拉佢走。到下午四叔去清華大學接受名譽校董及戰略發展顧問嘅頒授時，記者再問佢新地嘅情況，四叔卻突然變面，好嚴肅咁話：「冇建設性嘅唔好再講。」搞到全場即時鴉雀無聲。
盛傳晉身政協常委嘅肥龍亦被問到有冇喺郭家大事中出謀獻策，佢重申冇咁嘅事，仲話同郭老太唔熟。

mailto:[email protected]