美國雜誌《People》每年都舉行全球最性感男士選舉，繼去年是《雷神奇俠》（Thor）澳洲男星基斯咸士禾夫（ChrisHemsworth）勝出後，今年就由英國萬人迷碧咸（DavidBeckham）奪得這項殊榮，佢更係首名出身自運動界嘅男士獲選。碧咸就勁謙話唔覺得自己靚仔、性感，對於今次獲封全球最性感男士，更笑稱要多謝形象設計師、髮型師同埋執相程式喎！

碧咸係公認型男，佢今次獲獎亦真係冇人夠膽質疑，不過荷李活電影《非常索凸務》（Zoolander）續集《非常索凸務2》主角賓史迪拿（BenStiller），趁住碧咸成為最性感男士都乘機抽水，於《非常索凸務》個官方Instagram公開賓史迪拿攞最性感男士嘅老翻《People》封面，仲要tag埋碧咸，一向玩得兼大方嘅碧咸都有即刻回應，仲於Instagram轉貼呢張相，又風趣咁話畀呢位性感男士搶晒風頭。