喺外圍同本地市場資金欠奉下，好多投資者高掛免戰牌，搞到個市喺應該反彈嘅時候，點推都升唔起，即使日本政府用入市呢一招嚟推高日本股市，港股都重係照跌可也。
喺咁嘅情況下，有幾個睇淡後市嘅行家，好似中咗獎咁周圍同人講後市重會點衰點折墮，呢啲將自己成就感建築喺人哋痛苦身上嘅人真係唔要得。
今年雖然係雞馬相沖，但似乎同雞有關嘅行業又衰唔得好多，點解伏勝會咁講？皆因喺內地開設養雞場嘅卜蜂（043）唔單止半年賺咗4700幾萬美元，重有消息話佢哋同黃老太間超市已傾掂晒，只係等港府首肯，咁就可以源源不絕咁將啲冰鮮雞交落嚟香港，到時唔憂無生意，所以叫大家留意留意。