拜仁慕尼黑星期六憑住臨完場前一個爭議12碼，主場以2:1反勝奧格斯堡，保持德甲開季四戰全勝。不過，執法球證基爾查（KnutKircher）賽後坦承畀錯12碼，搞到奧格斯堡一分都拎唔到，佢覺得好抱歉喎！

基爾查賽後接受德國《圖片報》訪問，佢話旁證嘅位置可清楚睇到奧格斯堡球員犯規，而自己只係眼尾睇到，並唔係睇得好清楚，所以佢信任旁證判決。不過基爾查話睇番啲相之後，要承認呢個判決係錯嘅，佢話︰「喺球場上係我話事，所以應該由我負責，呢個錯誤令奧格斯堡攞唔到分，唔好意思，我覺得好抱歉。」其實球證都係人啫，球場上錯判嘅事件成日會發生，呢位球證起碼錯咗肯認，值得欣賞。