陳逸寧、許懷欣(Ryan)、朱紫嬈、郭奕芯、樂印姊妹等，噚晚喺太古出席《C奶同學會2》首映禮，已經做咗媽咪嘅陳逸寧，笑言：「我都有班師奶同學會，今(噚)晚仲約埋一齊嚟睇戲，大家都無所不談，啱啱至傾開近期嘅性侵熱門話題，原來香港有好多呢類事件發生。」

當然，陳逸寧咁講得，梗有啲經歷，佢話：「我讀中二時試也俾人非禮，當時坐緊電車，因為好逼，有人用下體挨我。另一次就俾人揸patpat；再有一次參加運動會，見到有人喺天橋打開件乾濕褸露體。」有冇講粗口鬧對方?佢笑住話：「我真係唔係成日講粗口㗎！真係好㷫至會爆粗，不過當時初中，自己都好驚，o依家人大咗就會大叫啫！」佢仲話四歲嘅囝囝已經識分男女性別，等佢大個少少，會教佢性知識。

另外，Ryan同太太一齊到場，原來佢兩公婆趁兩個仔瞓咗，即刻飛車出嚟睇戲，Ryan話：「近挑好忙，飛咗美國三次，內地六次，下曷期又同爹哋去湛江做騷，終於有時間同太太過二人世界。」太太有冇投訴?Ryan話：「佢ok嘅，有時有啲騷都可以帶埋太太囝囝去會。」會唔會再生?佢笑話：「除非保證係生女至會考慮，不過太太嗰邊有twins基因，如果再生兩個仔就搞唔掂啦！」

更多娛聞，喺晒《娛果》
http://fb.com/appledailyent