當年今日
關於我們

【短片】【新城裁員後首個團拜】黎耀祥自爆股票損手冇咗過百萬

蘋果日報 2016/02/15 06:00

蘋果裁員黎耀祥股票新城即時團拜

新城早前先裁完員兼調整節目,今日就喺黃埔舉行新春團拜活動,喺裁員風波入面被轉兼職嘅薛家燕同林盛斌(Bob)就冇現身,而留任嘅DJ就得范振鋒、啤梨、林柏希同李國能等等,氣氛明顯較上年冷清。

藝人方面,有黎耀祥、鄭融、鄭欣宜、鄭俊泓、吳若希同胡鴻鈞等等。黎耀祥話19號要去芝加哥、紐約同三藩市等地登台,到時會帶埋太太去順道二人世界:「o依家每年都會預啲時間去旅行,有班朋友鍾意去日本,秋冬天都會去浸吓溫泉。」

黎耀祥仲話最近喺股票市場損手爛腳:「我都係買啲穩陣嘅大啲嘅股票,不過都蒸發咗3成左右,7位數咁上下,講起都肉赤。」

鄭俊泓就話噚日情人節收工之後就喺屋企休息。問到早前有傳佢入紙申請紅館開演唱會:「我唔知呀,都有問過老闆,佢話要買本雜誌睇吓,作咁大。其實未有計劃,嚟緊都做音樂同新歌。」佢話o依家做好自己先,目標2017年開紅館演唱會。

欣宜就自爆噚日喺佢嘅曲奇店見到夢中情人:「我一見到佢就決定做佢老婆,不過我好怕醜,耷低頭找錢畀佢咋。之後,落差好大,因為我約咗胡鴻鈞睇戲。」欣宜透露新年同爸爸鄭少秋拜年嗰陣玩魚蝦蟹,佢話自己仲贏咗少少:「我買胡蘆同蟹,因為胡蘆似我身型呀嘛。」

至於啤梨,被問到係裁員後第一個團拜,佢話:「好多熟同事都唔喺身邊,不過感覺都幾好。舊年公司有變動,自己心態都要變,要繼續努力,做好啲節目。」啤梨話自己已經同銳哥拜年,因為銳哥除咗係舊老闆仲係好好嘅前輩。被問到新城有冇向佢哋承諾唔再裁員?啤梨指冇提裁員問題:「o依家自由度好大,仲多咗司儀工作,我哋一齊努力。」