去年政改一役，最後關頭與中聯辦及特區政府一齊「起錨」嘅民主黨，民望一直危危乎，有啲人就話要在今年嘅區議會選舉中懲罰民主黨，要佢哋票債票償，不過以香港人功利作風，與其用選票教訓民主黨，不如用鈔票更加實際，因此民主黨今年獎券籌款活動，就在忐忑氣氛中開始。
黨主席何俊仁噚日帶隊在中環賣獎券，八方現場所見，途人反應不熱烈也不冷淡，係正常對待政客嘅態度，等咗冇耐，仁哥終於等到一位「豪客」，八方見佢同仁哥握一握手，隨即在銀包抽出一張金牛放入籌款箱。
民主黨今年籌款目標係100萬元，同以前差唔多，而去年大約賣獎券籌款約160萬元。去年民主黨黨慶大排筵席籌款，好多富豪都畀面買枱，特首高官都有到場，籌到破紀錄110萬元，民主黨今年經費應該無後顧之憂啦。