【新增影片】
曼城呢期大勇，喺上輪英超主場5:0大勝利物浦之後，到周三歐聯再炒對手，作客飛燕諾贏4:0。中堅史東斯喺呢場歐聯梅開二度，或者唔係令人太覺得出奇，但佢全場一共製造134次傳球，其中131次成功，係曼城球員單場歐聯成功傳球次數嘅新紀錄，而近98%嘅傳球成功率，亦拍得住前巴塞隆拿中場，傳球大師沙維嘅紀錄。

史東斯上季以5,000萬鎊轉會費由愛華頓轉投曼城，初嚟步到表現一般，但經過主帥哥迪奧拿一年嘅調校，到今季進步明顯。史東斯變身出擊後衛，有入波能力之餘傳球亦有一手，周三場波傳134次命中率高達97.8%實在犀利。不過歷來單場歐聯傳球命中率嘅紀錄，仍然係由沙維保持，佢喺2013年8強對巴黎聖日耳門嘅比賽，全場96次傳球全部到位，即係100%。