隨着油價越升越高，普通汽油每升$16.71，相信不少市民同我一樣，曾經想過如果可轉用柴油私家車你話幾好呢，慳得幾蚊得幾蚊嘛，這是個推因。而拉大家轉投柴油車的因素，絕對是近年各大車廠先後以汽油車規格發展出柴油版本，而且柴油引擎的環保標準越來越高，設備睇齊，在質量優勝而更慳錢的大前提下，又怎會唔心動？

最新2012年Discovery43.0柴油版本，今次Upgrade直情將同門兄弟Jaguar的器官移植過來，例如波箱由以前的6前速變為8前速波箱，波段分佈更多更細緻，令油耗有更佳表現。而上代波箱上那支又長又粗的波棍，就變為圓形旋轉式操控，與JaguarXJ或XF等型號一樣，即時令內櫳更加優雅美觀。同時，軚盤兩邊新增加減撥片操控，是柴油車之中絕少見到的配備。引擎輸出上升至256匹馬力及600Nm強勁扭力，使行車暢順爽勁。更值得一讚是車廂的隔音功夫做得非常好，使到拍攝時直奔山頂，坐在車內依然非常寧靜。

若然大家硬要將柴油版與汽油版的Discovery分上高低，我可以說柴油版的貴氣有過之而無不及。今次Discovery4配備真皮座椅，從裁剪花紋可見廠方的心思。而車廂裝上11隻HarmonKardon380W的喇叭及重低音喇叭、藏在手枕內的USB接駁口，再配合7吋輕觸式屏幕及音響設備，只要在屏幕篤一篤，揀歌和手機充電話咁易。而車主亦可透過藍芽系統，播放手機內歌曲或用作免提系統都得。如果蒙着眼走進車廂，單憑車廂佈局、音響質素，你絕對有可能誤認為是一部豪華房車，而非一部原本概念是粗獷、具越野性能的Discovery。

可惜是由於柴油版Discovery在香港現行的交通法例下，需要以客貨車資格出牌，大家都知一旦身份是客貨車，就如FiatDoblo一樣，車廂與尾廂之間需加裝鐵絲網分隔，尾窗亦要封閉，這隔膜不但將車廂的連貫完全分開，更破壞了廠方艱辛打造的美學。

引擎：2,993ccV6柴油渦輪增壓
馬力：256PS/4,000rpm
扭力：600Nm/2,000rpm
傳動：8前速自動連+/-
售價：$702,000
查詢：28917780（LandRoverHK）