聽晚燭光集會，保守估計會有8萬人出席，大話怕計數，如果大家一樣咁撐支聯會，聽晚可能籌到逾200萬元，對近年財政頗為緊張嘅支聯會而言，係十分可觀嘅經費來源。據八方了解，支聯會方面聽晚會出動多一倍，大約20架手推車穿梭維園募捐，希望大家20年如一，好似89年捐款支持北京學生咁，繼續支持愛國民主運動。
籌款數字條數表面上如此計，實際上冇咁簡單，支聯會估計當晚會有其他社運團體、政黨喺場內外擺檔籌款，唔多唔少都會分一杯羮，亦因為各個團體成員各為其主自己搵食，所以支聯會亦搵唔到更多義工在場內推手推車籌款。
香港人出錢出力支持中國民運、要求平反六四，由89年起到家都冇變，大家捐款畀支聯會，等支聯會有資源推動中國民主化，根據支聯會資料，佢哋每年大約支出150萬元，主要係辦活動同做教育工作薪火相傳，去年因為將籌款所得捐助四川地震災民，所以出現約45萬元營運赤字，最新結存資金約300萬元。
近年社運百花齊放，支聯會江湖地位夠，籌款數字力保不失，其他團體、政黨相對之下就要花更多氣力先有着落，而7.1遊行更係「集資」大日子，往年各團體同民陣就分賬作經費問題而傷和氣，據知今年實行新制度，擬在遊行時籌款嘅團體需預支「上期」，埋數後多除少補，免得遊行後留下算不清糊塗賬。
mailto:
[email protected]