中外運航運（368）現價比2007年11月上市價8.18元大跌82%，幾乎去番2008年海嘯價，兼跌到近每股淨現金水位！中航運上演瘋牛期上市，當日最高見8.25元，亦即歷史離高位之後，一瀉無回頭，現價（1.46元）同2008年10月慘烈海嘯價0.96元，已經差無幾。中航運上市咁耐，航運業不景氣，近幾年成績單，一啲都唔省鏡，形成股價深潛。

中線博注資重組

但咁睇，中航運今年6月尾淨現金，高達50億（港元．下同），或每股1.26元，集團現價幾乎等於每股淨現金。而中航運絕大部份現金，係揸美金，呢期人仔貶值，唔關佢事。
又呢期中遠太平洋（1199）同中海發展（1138）系統股票停牌，玩超級大重組。場內有級數航運、物流瓣數股份，唔係剩番好多，有券商就估計，包括招商局國際（144）同中航運相關系統，包括中國外運（598）同外運發展，會喺物流同散貨上有重組。中航運管理層亦講明，隨住母系理順，相信集團亦有重要資產注入。中航運有重組注資concept，亦有必要行呢步，先有轉機。
中航運呢個殘價，得0.36倍PB。上邊中外運0.8倍PB，外運發展更家去到2.3倍。中航運PB平咗一大截之餘，總市值得58億元，街貨權益得35%，等值20億元咁大把，若果真係落實重組注資，中航運奀豬豬市值，易彈動。中航運再跌，質穿每股淨現金值1.26元，冷灶小注煲一煲，博中線注資重組，翻半番到1.88元，先得0.45倍PB，未有耐追到上邊外運系PB水位，更未有耐番到家鄉。

錢雋
細價股專家
本欄逢周一、三、五刊出