當年今日
關於我們

  楊永強含淚說再見
  李國章、何志平啞仔食黃連 - 李八方

蘋果日報 2004/09/30 08:00


董特首今日率領大隊人馬上京朝聖,咁大棚香港官商名流、傑出人士坐埋一架飛機,八方驚過佢,唔怪得好多叻人好似唐英年咁都先行一步,上咗北京等大軍殺到。
以胡溫曾為新領導核心嘅黨中央口口聲聲話要視港澳為「嶄新課題」嚟對待,今日喺人民大會堂分分鐘有最新指示畀董曾唐及一眾香港棟樑,可惜時不我與,阿董兩個契仔梁錦松同楊永強以及契女葉劉淑儀都先後下台,冇緣親近領導。
儍強又的確係斯人獨尷尬,因為佢嘅任期到下個星期初屆滿,本應可以上京,做埋最後一場大戲,但係唔知係北京冇請柬,抑或佢醒目,前兩日自己閃開,去咗新西蘭訪問四天,同當地醫療領袖分享對抗沙士經驗喎。嗱,呢啲真係叫做到最後一分鐘,鞠躬盡瘁啦!
儍強真係忍着淚說再見。因為舊年搞掂咗沙士之後,佢一直以為可以大步檻過,同老董共同進退,做到○七年先至寫回憶錄,點知立法會報告一出,佢先知自己唔下台唔得,老董都保佢唔住。不過佢臨尾都算灑脫,話走就走,冇再拖累民望低無可低嘅老細,可惜老董咁都唔賣最後一個人情,畀佢幫手選繼任人。結果儍強叫老董唔好迷信醫生,佢就偏偏要搵醫生;儍強話某某人可能有問題,上咗位會有好多狗仔隊跟,老董偏偏話唔怕,死牛一邊頸唔聽儍強講。真係有心向明月,明月照坑渠。
老董臨尾先交到名
老董嘅領導能力,其實不必有幻想,否則黨中央點解喺四中全會通過嘅《決定》文件中,都話要幫佢提高管治水準。今次搵人替阿強,又係等到最後一刻先至交到功課,如無意外,個候選人嘅大名已經交咗上北京,𠵱家大家等公布。何兆煒就快有新老細,唔知佢點諗呢?
到咗呢個階段,李國章同何志平兩位有醫生背景嘅局長都可以唞啖氣,唔使俾班記者日追夜追,問佢哋會唔會接儍強棒?八方聽聞,老董好似冇搵過佢哋,正式神女有心,重俾人唱成大熱,你話係咪啞仔食黃連,有苦自己知;重有人話李國章扭計,要拆局先肯做,就更好笑。
李何兩人都有意角逐下任特首,阿瑟王連陳日君都敢硬碰,而肥平就求得下下籤都冇事,可見兩人政治手腕甚高,老董點會畀機會佢哋大展身手呢,要提攜都提個會感恩嘅人啦。


傳真︰2623-9278
電郵︰[email protected]