公益金今日喺灣仔會展舉行周年頒獎典禮，特首夫人梁唐青儀做主禮嘉賓，賭王何鴻燊捐款逾100萬，榮獲公益榮譽獎，二房二女超鳳代表何生出席領獎。何生日前公佈退任信德集團行政主席及執行董事，並由長女超瓊接任。(新聞連結： http://bit.ly/2sJwtyK )問到超鳳爸爸係咪已交棒畀家姐超瓊？原本表示唔接受訪問嘅超鳳心情靚靚話：「係呀。」講到何生係咪已經完全退休？超鳳話：「咁佢都仲係主席。（榮譽主席）」至於問到何生身體狀況？超鳳就話：「佢身體好好呀。」之後就匆匆離開。

而今日得獎者仲有富士攝影嘅孫大倫同音樂人雷頌德（Mark），Mark攞到公益優異獎，有指佢舊年捐過40幾萬善款，Mark就澄清話：「我邊有咁多錢呀，只係上年Leon演唱會之後，做咗本相集，因為經過咁多風風雨雨，所以就將相集嘅收益捐畀保良局。」提到暑假，Mark冇懼恐襲，一家會去英國歐洲旅遊，Mark話：「少少危險，小心啲啦，唔去人多嘅地方，小朋友返學，暑假想去耐啲遠啲，原本只係去英國，o依家加咗地方，搭埋火車去歐洲。」人人都取消英國行程，Mark就話唔驚，佢話：「冇事嘅，plan咗好耐，我哋好鍾意去倫敦，冇辦法，唔緊要啦。」