有線節目《怪談》早前搵咗模謝芷蕙（Cammi）做主持，引嚟好大迴響，有觀眾更打電話入去鬧佢做節目時遊魂，叫佢畀心機讀書好過，唔好再貪慕虛榮。
之前一直係《怪談》主持嘅梁思浩，已經接番手主持呢個節目。不過今個星期有雜誌影到Cammi半夜去到陳冠希（Edison）嘅寓所送外賣，睇嚟佢同Edison嘅關係都未斷得晒。
梁思浩知道後覺得好有問題，佢前晚去旺角同電台聽眾睇完新戲《陽光姊妹淘》之後，噚日接受電話訪問時話：「有機會畀佢（指Cammi）做節目就畀心機做好份工，有書讀就讀好啲書，如果咁鍾意送外賣可以去麥記做麥麥送。」

錄影時不停補妝

原來思浩發火係有原因嘅，佢聽有線嘅工作人員講，Cammi喺做節目時遊魂不特止：「監製對佢好好，收視得番三份一都繼續用佢。點知佢用公司資源去送外賣，錄完晒個節目佢仲走去補妝set頭，正常做完都走啦，仲化乜嘢妝，睇咗本雜誌就知乜事啦，同埋佢錄一次節目會來回化妝間幾次。」最後思浩話唔係幫住Edison，但佢覺得Cammi唔好再利用其他人嚟宣傳。